الخبر كان في الصدارة
مصر بتعيد الحضارة
الجديد كان درس واحد
الوطن مش شخص واحد
الوطن ده لكل واحد
هما قالوها بجسارة
***
الخبر على كل شاشة
و الوشوش دايبة بشاشة
الوطن بقى حر نفسه
انطلق للكون ينافسه
يعلى للأمجاد بنفسه
و الأمل يحيي الحُشاشة
***
الخبر ما عادش حصري
بس متحيِّز لمصري
واللي تشهد بيه الأعادي
حق زي الشمس بادي
حلمي أرجعلك بلادي
بعد ما كان حلمي هجري
***
الخبر ما كملشي لسه
الهرم فيه حتة ناقصة
و البُنا لازم و عاجل
و الحساب جاري و حاصل
و الكلام الباقي آجل
كل ساعة و ليها قصة
3 التعليقات:
كل شطر يحكي قصة أو به ملخص للأحداث التي جرت على أرض المحروسة ملخص لما كنا ثم أصبحنا عليه ولكن
هل بالفعل وصلنا للمبتغى ؟ إشارة تنبيه قوية واضحة محذرة أن البناء لم يكتمل ولعل الجزء الناقص سيكون مصدر القوة للمحافظة لما وصلنا إليه
أثناء قراءة تجري أمام عينك كل الأحداث حتى المشاهد المعروضة على جميع القنوات للمظاهرات والابتهاج بالتنحي ووووو .... وفجأة أتذكر هذه الأبيات:-
( مصر بالليل بتجيلي
تقلع همومها و تميل على صدري..
بشوارعها و بيوتها ..
بشجرها و ناسها ..
اللي نايمين و اللي صاحيين)
(ما تنطقش غير لما اسكت
تقولي تعبت ولا خلصت الكلام
اقولها لا ده و لا ده
انا بس نفسي آخدك في حضني )
نفسي كلنا ناخدها في حضننا.. من غير ولا كلمة
كل ساعة و ليها قصة
كل ثانية فيها كارثة
هقولك ايه بس استحملي معايا شوية كمان ، قربت تهون وانتي عارفة إن الطريق مش سهل،أنتي عارفة إن النخاسين اللي باعوكي لسه لهم بواقي زي الأفاعي
اصبري ...ما تزعليش يا مصر
إرسال تعليق