حن يا ماضي

حن يا ماضي

إحنا مصر

إلي كل المقبوحين و القِباح و القَباحى و القَبْحَى الذين لا يرون في هذا الوطن الجميل

إلا المعتوهين و الخُبْل الذين ضاقت عنهم المصَحّات و المشافي ،

أو مصاصي الحرام و مدمني الفساد الذين أفلتوا ـ حتى حين ـ من قبضة العدالة و سيف الحق

إلى كل هؤلاءـ و هم أقِلّاء يحسبهم الجاهل كثيرين من الصوت المنكر ـ أهدي كلماتي

إحنا قلب كبير بيظهر كل شِدَّة
بس قُدَّام الأعادي أكيد أشِدَّة
إحنا غالي دمِّنا
عمره ما يضيع حقِّنا
لو تفوت مليون سنة
إحنا مصر


***


إحنا حلم ببكرة أجمل مالنهاردة

ليه مانِبْقاش .. ليه بْأقل حاجة نِرضى
إحنا بينّا مافيش (أنا)
زي مالهرم اتبنى
إيد على إيد كلِّنا

إحنا مصر

***

إحنا بيت العيلة بيتنا بتاع زمان
إحنا جار بالود يسأل عالجيران
واللي غايب عنِّنا
لِحَدّ ما يرجعلنا
نِوْصِلُهْ بحبِّنا

إحنا مصر

***

إحنا صوت الحق لما يتوه ما بينّا
إحنا صورة بنت ما بتجرحشِ عينّا
إحنا يوم العيد هنا
واحنا شاكرين ربِّنا
الجرس و المِئذنة 
إحنا مصر
إحنا مصر
إحنا مصر

عارفة يا مصر !

عارفة يا مصر..
أكتر واحد من ولادك على أرضك لاعن اليوم اللي اتخلق فيه مصري..
و نفسه يهج ان شالله يحشر جتته في تابوت شايله موج عالي في ليلة سودة مع خمسين واحد كفران زيه..
المهم يصحى بعد الكابوس و هو بعيد و حالف ما يعود و يخطي عليكي..
هو نفسه و في نفس اللحظة اللي بيلعن فيها مستعد يموت عشانك لو كلب مد بوزه النجس على خط حدودك

عارفة يا مصر..
أكتر واحد من ولادك براك راميكي و ناسيكي و لا عايز حاجة تفكره بيكي..
و لما تيجي سيرتك تبقى بحمد الله انه فلت من نارك ، و مش شايف أي أمل انك تتصلحي إلا لو جه عاليكي واطيكي..
لو حد غريب عنِّك عاد وراه كلامه اللي لسه قايله دمه يغلي في عروقه.. و لو صعيدي - راجل ابن راجل ـ مش بعيد يجيب كرش اللي قدامه

عارفة يا مصر..
أكيد كل الناس بتحب أوطانها.. و تغير عليها و تموت فداها.. و إلا يبقوا خونة
لكن احنا عكس الناس كلها.. خونة طول الوقت !
خاينينك في حضنك أو براه طول ما احنا حاسين انك مش حاسة بينا..
اللي يسرق فلوس و يجري على أقل من مهله على مطار برج العرب  لبلاد بترمينا جثث من البلكونات !
و اللي يتسلط على الناس يذل أيمانهم بأقل حاجة في إيده.. هو فيه بعد ما الزبالين ما رضيوش يشيلوا الزبالة !
و اللي ماشي يخرب في (شوارع الحكومة) ما هي عمرها ما كانت شوارع اللي خلفوه
و اللي يستحل في جتت البني آدمين أكل ما تستحملوش مخلوقات الله دونا عن المصريين ما هو أصل احنا نهضم الزلط
و اللي يسرطن و اللي يسبخ و اللي يعطَّن و اللي يلبخ و اللي يطنطن و اللي يأنتخ
كله كله خونة.. و كل واحد شايف كل الناس حواليه كده إلا هو و قليلين حواليه !
لكن الخونة دول اللي الواحد يبقى متهيأله هياكلوا بعض (أحياءً) .. حتى لو على حاجة هايفة.. زي ركنة عربية ولا دور في طابور.. ولا حتى كام جنيه !!
الخونة دول اللي هاينين بعض و شاتمين بعض و ضاربين بعض و ذالين بعض و مخونين بعض .... و مكفرين بعض
هم نفسهم اللي يجروا بواحد مخبوط و مرمي في الشارع على مستشفى و يفضلوا جنبه كإنهم أهله و هما ما شافوش خلقته قبل الساعة الغبرة دي و يبقوا مش عارفين عملوا كده ليه و دخلوا نفسهم في سين و جيم و بوليس و نيابة
هم نفسهم اللي يلموا لشحط واقف بيعيط و يقول ان فلوسه اتسرقت و مش عارف يروح بلدهم ـ و هما من جواهم بيقولوا شكله نصّاب ـ بس يفضلوا يلموله لحد ما يسافر بلدهم
هم نفسهم اللي يبقوا بينهم قواضي و محاكم و يجروا على عزا أو زيارة مريض و يقولوا ده واجب ما يصحش دي حاجة و دي حاجة
هم نفسهم اللي بيفهموا في كل حاجة و يفتوا في أي حاجة عن جهل ..  و يطلع من بينهم اللي ينور الدنيا كلها علم و دين و فن و أدب..
مش كان نهار الدنيا ما طلعشي و هنا عز النهار ؟!
هو النهار عشان جالنا بدري .. ليِّلت بدري يا مصر ؟!

مصر بالليل

مصر بالليل بتجيلي

تقلع همومها و تميل على صدري..

بشوارعها و بيوتها ..

بشجرها و ناسها ..

اللي نايمين و اللي صاحيين

بتبكي بحرقة ..

من غير ما تنطق ولا حرف

و بعدين تسكت و تبصلي

عايزاني اطيب خاطرها بكلمتين غزل فيها

افضل اقول كلام للصبح

و هي ساكتة و بتضحك

ساعات ضحك جواني..

متداري بيحايل في خدودها

و ساعات ضحكة مجلجلة ..

زي رنة صف الغوايش

ما تنطقش غير لما اسكت

تقولي تعبت ولا خلصت الكلام

اقولها لا ده و لا ده

انا بس نفسي آخدك في حضني

مصر بالليل

بتاعتي

صاحبتي

حبيبتي

تم النشر عن طريق برنامج بلوج برس آي فون