حزب الكنبة

ما بقتش اتعب نفسي : ( أصدَّق ؟

و لاَّ اتفلحس و ما اصدَّقش ؟ )

باظبط طبقي.. و اسحب كرسي..

و اسكت خالص.. و ما اسبَّقش

وسط الحدث (الحصري) الحالي ..

وسط الفوضى الـمُبْتَكَرَالي

بقى فيه دخّان من غير نار..

و كمان نار ما بتحرقش

ليل مصر الحزين

وقفة الشارع في ليل مصر الحزين

عرَّفِتْني قد إيه الناس طيِّبين

لحظة الخوف جمَّعِتْنا

قلنا يا عِشْنا.. يا مُتْنا

مصر حبيبتنا و بيتْنا

للِّي مَعَ أو ضِدّ أو من أيّ دين

الخبر

الخبر كان في الصدارة

مصر بتعيد الحضارة

الجديد كان درس واحد

الوطن مش شخص واحد

الوطن ده لكل واحد

هما قالوها بجسارة

***

الخبر على كل شاشة

و الوشوش دايبة بشاشة

الوطن بقى حر نفسه

انطلق للكون ينافسه

يعلى للأمجاد بنفسه

و الأمل يحيي الحُشاشة

***

الخبر ما عادش حصري

بس متحيِّز لمصري

واللي تشهد بيه الأعادي

حق زي الشمس بادي

حلمي أرجعلك بلادي

بعد ما كان حلمي هجري

***

الخبر ما كملشي لسه

الهرم فيه حتة ناقصة

و البُنا لازم و عاجل

و الحساب جاري و حاصل

و الكلام الباقي آجل

كل ساعة و ليها قصة

شباب الورد

غناء/ أحمد فتحي

لحن و توزيع/ طارق خليفة

كلمات و رؤية/ أحمد حماد

هترجعي ..
تنوري

آمنة في لياليكي

من الكنيسة..
لأزهري

متوحدين بيكي

بروح شباب الورد

اللي اتبدر عالأرض

يحمي الحمى و العرض

يهدي صباه ليكي

***

مصر القلوب مخلصة

يا ام العقول مشمسة

و الليل برغم القسا

غلبه السماح فيكي

***

لمي الولاد في الحضن

يسقي الحنان الحزن

و تخيب نوايا الجبن

اللي حواليكي

هترجعي ..
تنوري

آمنة في لياليكي

من الكنيسة..
لأزهري

متوحدين بيكي

سِكة وعرة

مصر هي أمي

نيلها هو بوي 

و اللي من ولادها

في الوطن ده خوي

و اللي يمس شعرة

أو يطلع بنعرة

يمشي سكة وعرة

عـوّا أو بيشوي